Fjallabergsóleyjarafbrigðið bleika er einstaklega harðgert og blómstrar oft óvenjusnemma á suðurvegg í skjóli.  Blómin eru fölbleik og blómgunin ríkuleg.  Móðurplantan er í Lystigarði Akureyrar.  

Fjallabergsóley er ein allra harðgerasta klifurplantan.  Hún klifrar auðveldlega upp frístandandi skúlptúra, skjólveggi, trjástofna og húsveggi og stækkar með hverju árinu.  Hún þarf net með stóra möskva til að festa sig í.  Bergsóleyjar vefja blaðstilknum utanum granna strengi.  

Fjallabergsóley má EKKI klippa á vorin, nema kannski smá leiðréttingar á heildarútlitinu.  Fjallabergsóley blómstrar nefnilega á greinarnar sem uxu í fyrra, og blómstrar því um leið og hún laufgast í apríl, maí og júní.  Ef þarf að klippa til fjallabergsóley og snyrta mikið, er best að gera það strax eftir blómgun í júlí.  Það sem eftir lifir sumars og fram á haust dugir fyrir hana til að mynda nýjar greinar með blómbrum fyrir næsta ár.

Eftir gróðursetningu þarf að gæta að vatnsþörfinni allt fyrsta sumarið, sérstaklega ef gróðursett er upp við húsvegg.

Myndin af bergsóleyjunum á súlunni er tekin í Lystigarði Akureyrar árið 1995.  Bæði fölbleika og hvíta afbrigðið flækjast þarna saman.  

Clematis alpina ssp. sibirica bleik