Kínareynir ‘Bjartur’, Sorbus vilmorinii ‘Bjartur’

Ólafur Njálsson stakk í vasa sinn berjum af litlum runna með bleikum berjum í garði garðyrkjuskólans í Norður-Wales haustið 1989, sáði þeim strax um haustið og 5 plöntur urðu til vorið 1990.  Ein af þeim er þetta tré sem fékk heitið ‘Bjartur’.  Tréð er sumarið 2006 rúmlega 3 metra hátt og krónan 3 metra breið.  Kínareynir getur bæði verið stór runni eða formað sem smávaxið tré með klippingu.  Kínareynir kelur ekkert og hefur stundum fengið skæran rauðan haustlit. Sendinn, frjór jarðvegur á vel við hann, þolir vel hálfskugga og auðveldur í ræktun.  Tréð er enn í örum vexti og ekki er endanlega séð fyrir hversu stórt það geti orðið.  Í heimkynnum sínum er kínareynir smávaxið tré.  Berin eru í fyrstu brúnrauð en lýsast og verða skærbleik.  Þrestirnir éta þau síðast af öllum reyniberjum og þá ekki fyrr en þau hafa frosið og þiðnað.  Berin eru anzi bitur! 

 

Kínareynir